囝囝出世冇瞓照贏波 柏加Super Dad!

馬刺周三憑住剛做老竇嘅柏加射入全隊最高嘅23分，主場以109:103贏咗小馬，目前場數反先3:2，贏多場就可以出線，繼續向冠軍之路進發。
馬刺對小馬一向都勢均力敵，但今次成場波，馬刺從未落後過，其中一大功臣應該係柏加喇。場波喺美國時間周三晚打，不過柏加同未婚妻Axelle嘅愛情結晶品Josh就喺周二深夜搶閘出世；上場波左腳拗柴仲未好番嘅柏加，喺幾乎冇瞓兼帶傷上陣嘅情況下，竟然仲可以射入23分同交出5次助攻，幫馬刺贏出第5場嘅關鍵大戰。
雖然自稱因為囝囝太夜出世，搞到自己成晚都冇瞓過，但係柏加今場一開波就龍精虎猛，比賽6分鐘已經攞咗10分。而比起前4場嘅有頭威冇尾陣，今場柏加喺第4節尾段就入咗球罕有嘅3分波，幫馬刺領先7分，基本上鎖定勝局。

[img]http://static.apple.nextmedia.com/images/apple-photos/apple/20140502/large/02s7-101p.jpg[/img]
■柏加（右）同Axelle（左）咁甜蜜，囝囝Josh出世之後就可以一家三口樂也融融啦。資料圖片


鄧肯：越眼瞓越勁
賽後柏加當然好開心，仲話今場波只係靠腎上腺素頂住㖭。不過老友鄧肯就笑佢，話佢聲稱冇瞓覺其實只係作大博同情咁話。講完笑，鄧肯都認真咁補充：「我賽前已經同佢講咗，佢喺呢種環境之下嘅表現會好好。唔夠瞓、壓力大呢啲因素反而令佢打得更加好；為個仔同為隊波佢都好想贏到場波。」教練普波域治亦笑笑口話，雖然明知對柏加嚟講，囝囝重要過場波，但佢兩者都可以兼顧到，抵讚！
呢邊廂柏加第1次做老竇，全城熱烈祝賀，不過佢嘅前妻伊娃目前都過得好開心；雖然離婚後一度迷失，但據報佢𠵱家同成熟穩重嘅富豪感情穩定，已經完全放低咗柏加。

林瘋助火箭追成2:3
德州大戰系列場場精采，周三上演嘅另外兩場都一樣打甩髀。火箭今場有一路表現平平嘅林書豪後備上陣入咗21分，一洗前兩仗關鍵時刻失誤，將功補過之下，主場以108:98再贏拓荒者，場數追到落後2:3，仍然有望晉級；速龍同日都險勝網隊115:113，領先3:2。

[img]http://static.apple.nextmedia.com/images/apple-photos/apple/20140502/large/aa0701b.gif[/img]

來源:蘋果日報網站