阿信屋：明年停開舖　後年先同佢打過

3年前由賣日本零食突圍，到現在分店猶如「梗有一間喺附近」的阿信屋，明年終告別高速擴張年代。阿信屋即將進入續租期，為維持微利，老闆林偉駿預告明年會集中火力提升分店效益，甚至關掉10至15%不太賺錢的細分店，轉開面積較大的超市，「後年先玩大佢」。



林偉駿解釋，「你唔咁做唔得，不斷開舖咁耐，一定要沉澱吓。如果明年經營穩定到落嚟，後年再同你玩大佢！」阿信屋以靈活營運見稱，最近半年不斷有新搞作，由微型超市，到近日計劃賣埋化妝品。林偉駿坦言，阿信屋發展至此階段，未來重點是要把現時不太賺錢的分店關掉或轉型，而非再大舉開舖。
「呢幾年開咁多舖，梗有一啲效益唔好。𠵱家蝕錢嘅舖有3間，好似大窩口邨間舖，月租8,000蚊都做唔掂，屋邨老化，就算每月賣到幾千蚊通粉，夠畀租，都要蝕人工呀！」林偉駿承認，這3年來每年開舖逾60間，攤薄了生意，令部份細舖效益不佳，僅能維持開支。
「𠵱家分店數目有160多間，到年底肯定達180間，到時候就會停手，唔再增加分店，只會換舖。我希望可以關掉20至30間細舖頭，轉開幾千呎嘅微型超市，賣多啲新鮮、急凍食品。」

[img]http://static.apple.nextmedia.com/images/apple-photos/apple/20131118/small/18bk03p.jpg[/img]
■林偉駿表示，未來將會向本地食品供應商取貨，正式「踩過界」。

[b]麵包蟹上架　即日沽清[/b]
阿信屋8月在西灣河首次試開6,000呎小型超市，與樓下的百佳正面交鋒。記者上周三下午2時抵達該舖，見人流頗多，其中如英國麵包蟹、日本帶子等急凍食品最多人幫襯，佔銷售近6%，麵包蟹即日上架已沽清。但該店零食仍為主打，佔生意逾60%。「呢間舖開張第一日已經收支平衡，未來要再加大急凍食品嘅比例。超市人手雖然多啲，但呎租平咗，所以最後利潤率同一般阿信屋差唔多。」

[b]料業主最多加租10%[/b]
去年度阿信屋做了8.12億元生意，分部盈利只有1,162萬元，利潤率微薄得只有1.4%。本業是生產線圈的CEC國際(759)，為拓展阿信屋業務，近年亦有舉債，銀行貸款總額為4.3億元，一年利息支出1,345萬元。
但求薄利多銷的阿信屋，能否抵抗業主加租、利息、經營成本上漲的壓力？林偉駿對此仍然樂觀：「政府打壓完個樓市之後，仲有邊可以勁加租呀？業主係企得硬，但我估加8至10%左右，已經好盡。如果大環境經營成本上升，我咪照加返價，但仍然會比其他人便宜。」
林偉駿表示，未來會開始向本地食品供應商取貨，意味阿信屋正式「踩過界」，在採購上和百佳、惠康等超市重疊。阿信屋能否保持到價格優勢？「呢個真係挑戰，要和供應商慢慢傾。如果明年整固業務做得好，後年就再玩大佢，再開舖60間！」


[img]http://static.apple.nextmedia.com/images/apple-photos/apple/20131118/large/b0401a.gif/img]

[img]http://static.apple.nextmedia.com/images/apple-photos/apple/20131118/large/18bk01p.jpg[/img]
■阿信屋8月在西灣河首次試開小型超市。　


來源:蘋果日報網站