低胸嫩模sell新股　豪客半億捧場

棋牌網遊商博雅（434）噚日中午舉行上市投資者推介，除咗大派公司吉祥物、遊戲VIP金卡之外，仲出動4名𡃁模，分別着住紅色同黑色低胸超短裙，加埋幾吋高跟鞋，彷似四張移動啤牌，喺會場門外周圍走，相當搶眼。
早前有隻新股邀請張智霖出席投資者推介，令到一班女ibanker不停搵Cool魔合照，博雅搵來4位靚女，當然吸引唔少在場男性ibanker同分析員走埋去要求合照。公司CFO高峻峰唔知做乜，夾喺靚女中間影相，顯得尷尷尬尬咁，唔通怕另一半睇見張相，被扭耳仔？𠵱家乜嘢年代呀?
會場入面仲有一個試玩區，用手機同平板電腦駁通大電視，畀大家過吓手癮，即場試玩德州撲克、鬥地主、鋤大D等主打遊戲。

[img]http://static.apple.nextmedia.com/images/apple-photos/apple/20131031/large/31by05p.jpg[/img]
■其實合照好平常，博雅CFO高峻峰（中）唔使咁尷尬呀。


來源:蘋果日報網站