被爆雙性戀　港姐驚現腋毛粒粒胸

[img]http://static.apple.nextmedia.com/images/apple-photos/video/20130805/org/1375645796_c1a5.jpg[/img]

噚日20位香港小姐喺荃灣廣場，首次出席公開活動。
老老實實，今屆港姐真係可以見到佢哋有搞作嘅機會唔多，最近一次已經係睇佢哋個個著住加咗十塊墊嘅白色小背心影portrait，個個即時直線升cup。
影相就可以狂加墊，因為唔使點郁，企定定就得；但出席活動，如果「僭建」得太嚴重，動作一大就好易現形。所以，噚日就係見真章嘅時候喇。
當然，其實位位佳麗都係有料之人，但可以保持到同小背心輯相一樣cup數，真係好難。好似5號朱智賢咁，官方相就皮膚白白滑滑，不過到現場佢著住條白色低胸裙，就見到喺佢胸上有好多唔知係暗瘡定粒粒。
仲有好多，例如15號蔡思貝、7號沈桂澄、16號徐韶蓓等等，原先喺官方相裡面，條事業線好有立體感；但噚日去到現場，都係平平無奇；唯一同官方出入最細嘅，就係20號陳偉琪，仲騷出兩吋事業線添！
另外，1號張敬仁被爆搞雙性戀，但佢否認曾經跟女人拍拖，只承認中學讀女校有人追求：「我有同男仔拍拖，嗰時同個女仔講我有男朋友。」
至於活動司儀王祖藍，就喺台上爆料話，有佳麗食完飯冇清潔口腔，牙罅有菜。此言一出，嚇得唔少佳麗即刻用脷撩牙，相當不雅，事後祖藍唔肯透露係邊個，只叫大家玩photo hunt喎。

來源:蘋果日報網站