青心直說：自行泛舟勝跟風被覆舟

[size=5]旭日企業（ 393）與佐丹奴（ 709）同樣賣優閒服，市值卻相差一大截，前者 33億後者 71億；分析員關注度也有別，過去一年有關旭日嘅分析報告只得 3個，佐丹奴則有 45個。旭日盈利增長 40%至 3.63億元，主要係去年沽出 I.T（ 999）股份淨袋 1.37億元，扣除一次過因素，業績與去年持平，但毛利率由 43.5%回落至 42.6%。佐丹奴整體收入唔夠旭日多，但毛利率就有 57.7%，唔怪得話通脹反而益咗佢，尤其係今年冬天真太冷，可以加價。
旭日股價強勁反彈，完全係用息率回報即係個 Yield去承。零售股勝在性質簡單易明，最緊要估值吸引，旭日 PE唔夠 10倍，即使扣除一次性收入都不足 13倍，與佐丹奴相若；但息率 6.6厘，高於佐丹奴嘅 5.7厘。股價要行，揀啱時機較揀啱股票更重要，唔使等報告，已可落埋車兼食咗糊。


等大行報告慢幾拍
表面上越嚟越多投資者信奉，現實係大家越嚟越質疑其意圖嘅大行報告，投資者若唔言聽計從，就即時食正眼前虧，但若唔妥善運用獨立思維，研究股份究竟只係受外在短期因素影響，而長期基本因素未必有變，很容易會失諸交臂。以大藍籌中海油（ 883）年初至今嘅遭遇為例， 1月 28日里昂出報告叫沽，理由係資本開支升得比產量更快， 12個月目標價睇 13.40元，當日競價時段被質落至 15.62元，較前收市價跌足 16%，擺明靠嚇，好彩冇承過價。
故事仲未完， 10日後嘅 2月 8日，同一間行同一位分析員（今次加多一位）再唱衰，話中海油股價估值仍然過高，目標價卻不變，結果報告出街當日再跌 2%，前後五連陰累積跌幅達 10%。 2月 22日，見油價續上，出報告仍然叫沽，但目標價就突然升少少至 14.20元，跟同行同一分析員同期連環畀中石油（ 857）嘅買入評級剛好相反。 13.40元同 14.20元兩個神奇數字，之間相差嘅 8毫究竟代表甚麼，真係天知地知分析員至知。

胡孟青
[/size]