青心直說：滙控善用傳媒機器

[size=5]有芬佬話過，假如滙控（ 005）真的把總部遷來香港，預計股價即時會升三成。然而遷冊與否，最終可能涉及中、英兩國背後的游說角力，唔只稅收因素考慮，意識形態上遷冊有如剃英國政府眼眉。
會否背負欺師滅祖的指控，甚至被上綱上線視為叛國？反正蘇格蘭人都唔當自己係英國人，而 HSBC全名係 Hongkong& Shanghai Banking Corp.，本來就冇掛英國招牌。
一場金融海嘯改變咗華爾街生態，英國有樣學樣要當地銀行重組改革，財相歐思邦對監管金融業態度強硬，銀行面對高層花紅、資產稅、貸款指引、零售同投資銀行部門被迫分拆引致未來經營成本進一步上升，覺得唔高興絕對可以理解。
滙控喺英國有 5.2萬名員工，每年要交 12億英鎊稅，要為銀行資產稅多付 6億英鎊，明顯係 CEO要下調股東資金回報預測嘅主要原因，明知對股價即時有殺傷力都在所不惜，配合近幾日透過傳媒放風嘅伎倆，換取同英國政府討價還價嘅籌碼。


放風遷冊爭取籌碼
有報道指倫敦市長為保倫敦作為國際金融中心地位，擔心滙控遷冊會起示範效應，已展開游說救亡行動。可以預期，滙控未來幾個月同英倫嘅博弈會相當有趣。
CEO歐智華已點名，指造成集團成本高昂、效率偏低因素之一，就係集團旗下有太多地區總部。既然鎖定問題，可以預視投行出身，重視股價表現嘅歐大班將會手起刀落，精簡架構。
香港人對滙控有情意結，洋人對國土亦有一份心有所屬的情意結，滙控考慮或有意圖遷冊，特區政府無論如何都應該主動出擊爭取獅王回歸，提供配合嘅條件。對滙控小股東來說，面對為求體現股東價值的新任管理層，短期要大裁員削成本，可能不近人情，但等得太耐，遇上思維截然不同的新領導，至少應該給他些少時間發揮，再作結論！

胡孟青
[/size]